КАРАЧИ/ИСТАНБУЛ (АА) - Тројца бомбаши самоубијци и исто толку припадници на безбедносните сили утринава беа убиени во напад врз седиштето на паравоените сили во северозападниот град Пешавар, Пакистан, изјави висок полициски службеник, јавува Анадолу.

Шефот на градската полиција Мијан Саид за новинарите изјави дека бомбашите самоубијци биле пресретнати кога се обиделе да влезат во седиштето на Федералната полиција.

Еден од бомбашите се разнел на влезот од седиштето, а двајца успеале да влезат во комплексот, каде што биле пресретнати и убиени, додаде тој.

Безбедносните сили ја опколиле областа и спроведуваат операција за расчистување.

Претседателот Асиф Али Зардари и премиерот Шехбаз Шариф го осудија нападот и им оддадоа почит на безбедносните сили за брзата акција што спаси „скапоцени животи“.

Во посебно соопштение тие ветија дека војната на нацијата против тероризмот ќе продолжи и покрај „овие кукавички напади“.