КАРАЧИ (AA) – Речиси 90% од населението во Јужна Азија ќе биде изложено на екстремни температури, а речиси една четвртина на сериозни поплави до 2030 година, предупреди денес новата студија на Светска банка, јавува Анадолу.

Извештајот со наслов „Од ризик до отпорност: Помагање на луѓето и компаниите да се адаптираат во Јужна Азија“, кој се базира врз студии од Бангладеш, Индија и Пакистан, истакнува дека регионот е еден од најранливите во светот на климатски промени поради густата популација, растечките температури и географската изложеност.

Во студијата се наведува дека наредната деценија регионот ќе се соочи со „почести и посилни климатски шокови“.

До 2030 година се очекува 1,8 милијарди луѓе – или 89% од населението – да бидат изложени на екстремна жештина, а 462 милиона може да се соочат со сериозни поплави.

Извештајот повикува на посилни системи за рано предупредување, таргетирани програми за поддршка на ранливите домаќинства и политики за адаптација на растечките ризици.

Иако повеќето домаќинства во крајбрежните и речните подрачја имаат пристап до предупредувања за циклони, помалку од половина примаат аларми за поплави или други опасности, се наведува во документот.

Наодите покажуваат дека добро насочените програми за социјална помош, поддржани со ажурирани податоци, може брзо да се засилат во услови на климатски шокови за да ги заштитат сиромашните и ранливите заедници.

Но во извештајот се предупредува дека ограничените буџетски ресурси на владите значат дека адаптацијата на приватниот сектор, поддржана со сеопфатна политичка рамка, исто така, ќе биде клучна.