Украина: Продолжуваат жестоките борби во центарот на Северодоњецк

КИЕВ (АА) – Генералштабот на Украина соопшти дека продолжуваат судирите со Руската армија во центарот на градот Северодоњецк на истокот на земјата, пренесува Агенција Анадолија (АА).

Во соопштението на Генералштабот се оценува и последната ситуација на фронтовите во правец на Доњецк, каде што продолжува војната што Русија ја започна против Украина пред 100 дена.

Се наведува дека Руската армија продолжува да ги бомбардира позициите на украинските одбранбени сили во правец на Северодонецк и цивилната инфраструктура во областите Боровское, Устиновка и Лисичанск.

Истакнувајќи дека имало судири по целата линија во правец на Доњецк, констатирано е дека руските окупатори се повлекле на своите позиции откако изгубиле повеќе од 10 населени места.

Исто така, се забележува дека моралот кај руските трупи е паднат.

Во соопштението се додава и дека најмалку половина од 150. Моторизирана бригада на Руската армија позиционирана во правец на Попаснаја во регионот Луганск претрпе значителни загуби.

Се подвлекува дека во последните 24 часа се уништени 5 тенка, 3 артилериски системи, 2 оклопни возила и 3 беспилотни летала од типот „Орлан-10“ на Русија.