Украина им забрани на функционерите и воениот персонал да користат Телеграм

МОСКВА (АА) - Советот за национална безбедност и одбрана на Украина им забрани на воениот персонал и на државните службеници да ја користат апликацијата за пораки Телеграм на службените уреди, јавува Анадолу.

Прес-службата на Советот на Фејсбук објави дека одлуката е донесена вчера на состанокот на Националниот координативен центар за кибербезбедност.

На официјалните претставници, воениот персонал, безбедносниот и одбранбениот персонал и операторите на критичната инфраструктура им е забрането да инсталираат и користат Телеграм на службените уреди, се вели во соопштението.

Претставници на украинските разузнавачки служби ја обвинија Русија за користење на Телеграм за фишинг и кибернапади, како и за добивање податоци за геолокација на корисниците за одредување на воздушните напади.

Тие, исто така, истакнаа дека руските разузнавачки служби имаат пристап до личната кореспонденција и податоците на корисниците.