Burç Eruygur
13 Февруари 2024•Ажурирај: 14 Февруари 2024
ИСТАНБУЛ (АА) - Украинското Министерство за енергетика денес соопшти дека термоцентралата во југоисточниот регион Дњепропетровск во земјата била „значително оштетена“ поради руското гранатирање, јавува Анадолу.
„Ноќта на 13 февруари беше пукано врз една од термоцентралите во регионот Дњепропетровск. Како резултат на гранатирањето настанал пожар од големи размери, кој службите за итни случаи успеале да го изгаснат за само неколку часа. По извршениот увид констатирано е значително оштетување на опремата“, се вели во соопштението на Министерството.
Се додава дека енергетските блокови на централата се исклучени, станицата е празна и престанала да произведува електрична енергија.
Понатаму се наведува дека бил исклучен и надземниот далновод, што довело до краткотраен прекин на електричната енергија за потрошувачите.
„Во моментов се работи на санирање на последиците од пожарот и утврдување на обемот на штетите“, велат од Министерството.
Гувернерот на регионот Дњепропетровск, Серхи Лисак, исто така на Телеграм објави дека бил нападнат енергетски објект во регионот, што резултирало со пожар кој потоа бил изгаснат.
Во меѓувреме, украинските воздухопловни сили тврдат дека собориле 16 руски беспилотни летала поради нападите врз регионите Дњепропетровск, Запорожје и Херсон.
