Убиени 37.124 Палестинци од страна на Израел во Појасот Газа од 7 октомври досега

ГАЗА (АА) - Најмалку 40 Палестинци се убиени во израелските напади врз Појасот Газа во изминатите 24 часа, со што бројот на убиени од 7 октомври порасна на 37.124, соопшти денес Министерството за здравство во опколената енклава, пренесува Анадолу.

Во соопштението на Министерството се додава дека во израелската офанзива се повредени и 84.712 лица.

Многу луѓе сѐ уште се заробени под урнатините и на патиштата бидејќи спасувачите не можат да стигнат до нив, се наведува од Министерството.

Израел ја продолжува својата брутална офанзива врз Појасот Газа и покрај резолуцијата на Советот за безбедност на Обединетите нации со која се бара итен прекин на огнот.

Израел е обвинет за геноцид пред Меѓународниот суд на правдата, кој во својата последна пресуда му нареди на Тел Авив веднаш да ја прекине операцијата во Рафа, каде што повеќе од милион Палестинци побараа засолниште од војната.