Ömer Tuğrul Çam
23 Јуни 2023•Ажурирај: 25 Јуни 2023
ВОЗДУХОПЛОВНА БАЗА ШЛЕСВИГ/ЏАГЕЛ (АА) - Турските пилоти дел од вежбата „Воздушен бранител 2023“ (Air Defender 2023), најголемата мултинационална вежба за воздушна одбрана во историјата на НАТО, добија големи пофалби од нивните колеги, американските и германските учесници, јавува Анадолу.
Во вежбата, која траеше од 12 до 23 јуни, имаше 10.000 учесници од 25 земји со 250 авиони, кои спроведоа одбранбени маневри во европскиот воздушен простор под команда на Германското воздухопловство.
На вежбата зеде учество и Туркије со три авиони Ф-16 кои полетаа од Командата на 151-та ескадрила во турскиот град Мерзифон, Амасија, во регионот на Црното Море, кон Германија, изведувајќи приближно 40 летови во текот на вежбата.
Турскиот воен пилот, полковникот Ерсин Озмен, за Анадолу изјави дека Турските воздухопловни сили учествувале со три авиони Ф-16 и 56 лица воен персонал.
„Нашата цел беше да го зголемиме оперативниот капацитет и координацијата со земјите членки на НАТО“, рече тој и додаде: „За нас беше одлична можност да ја покажеме нашата борбена готовност и да ја унапредиме нашата соработка со членките на НАТО.“
Озмен рече: „Работевме меѓусебно со сите земји. Истовремено извршувавме мисии од различни воздушни бази. Видовме дека тоа е изводливо. Таквите мисии ќе се изведуваат и во вистинско оперативно опкружување. Поради тоа ова за нас беше значајна можност за обука.“
Американскиот потполковник Џош Хигинс, пилот на Ф-15 и командант на тимот од американската база во Њу Орлеанс, истакна дека имал неколку интеракции со турските пилоти за време на воздушната вежба и рече дека се добри и професионални пилоти и дека учеле при летањето заедно.
Германски офицер кој работеше со турскиот тим во текот на вежбата, исто така, изрази задоволство од соработката. „Работев со турскиот тим пред девет години. Затоа, знаев што да очекувам. Тие беа одлични, а вежбата помина многу добро“, посочи тој.
