ИСТАНБУЛ (АА) - Американскиот претседател Доналд Трамп се соочува со остри критики откако на социјалните мрежи сподели видеоснимка на кое поранешниот претседател Барак Обама и поранешната прва дама Мишел Обама се прикажани како мајмуни. Во видеото, исто така, се повторуваат веќе демантираните тврдења дека претседателските избори во САД во 2020 година биле наместени, јавува Анадолу.

Видеоснимката, која првично е продуцирана од екстремно десничарскиот медиум „Патриот њуз“, е направена со помош на вештачка интелигенција (AI) за да ги прикаже Барак Обама – првиот црномурест претседател во историјата на САД – и неговата сопруга како мајмуни.

Ваквите илустрации во САД се сметаат за расистички и историски биле користени за деградација на Афроамериканците.

Инцидентот се случува токму во февруари, кога во САД се одбележува Месецот на историјата на црномурестите луѓе.

Видеото веднаш доби критики од политичките кругови. Гувернерот на Калифорнија, Гавин Њусом, истакнат демократ и чест критичар на Трамп, преку својата прес-служба порача: „Одвратно однесување на претседателот. Секој републиканец мора да го осуди ова. Веднаш.“

Видеото, кое Трамп го сподели на својот профил на мрежата „Трут соушал“, ги повторува и неоснованите тврдења дека со гласачките машини во клучните држави било манипулирано во корист на Џо Бајден на изборите во 2020 година.

Во видеото се тврди дека гласачките машини содржеле скриени безжични модеми за пренос на изборни податоци и дека броењето на гласовите било намерно прекинато во неколку држави, каде што Трамп водел, за потоа да продолжи со наводен голем пораст на гласови за Бајден.

„Снимките од гласачките машини јасно укажуваат на употреба на модем и пренос на изборни податоци“, прикажано е во видеоснимката.

Дополнително, се наведува дека „форензичкиот пристап“ до машините за пребројување на гласови открил „странски безжичен чип“ во хардверот на машините и дека системите на „Доминион“ биле користени за измена на резултатите.

Трамп постојано тврди дека изборите во 2020 година му биле „украдени“, иако изгуби десетици судски спорови, а федералните и државните власти потврдија дека изборниот процес бил безбеден.

Во своите неодамнешни говори, Трамп повторно укажа на изборна измама, сугерирајќи дека федералната влада треба да ги „национализира“ конгресните избори оваа есен во најмалку 15 сојузни држави.

Политичарите и правните експерти ја критикуваа оваа идеја, посочувајќи дека според Уставот на САД, сојузните држави се надлежни за спроведување на изборите.

Анкетите за претстојните избори во ноември покажуваат дека демократите имаат предност за враќање на контролата врз еден или двата дома на Конгресот, што е вообичаен тренд за среднорочните избори.

Трамп, пак, постојано изјавува дека сите избори на кои тој или неговата Републиканска партија не победуваат, по дефиниција се „наместени“ или „нефер“.