Трамп порача дека утре ќе заземе цврст став за Газа

ВАШИНГТОН (АА) - Американскиот претседател Доналд Трамп денес изјави дека ќе заземе „цврст“ став за Појасот Газа, јавува Анадолу.

„Не знам што ќе се случи во 12 часот. Ако зависи од мене, би заземал многу цврст став. Не можам да ви кажам што ќе направи Израел“, им рече Трамп на новинарите во Овалната соба.

Претходно оваа недела, Трамп предложи укинување на прекинот на огнот во Газа меѓу Израел и палестинската група Хамас, доколку сите заложници од опколениот Појас не бидат ослободени до сабота (утре).

„Ако се прашувам јас, доколку сите заложници не бидат вратени до сабота во 12 часот, мислам дека е соодветно време, би кажал, прекинете го и сите предлози се стопираат, и нека избие пеколот. Би рекол дека треба да бидат вратени до 12 часот во сабота. ...И после тоа, би рекол да започне сиот пекол“, рече Трамп во понеделникот.

Договорот за прекин на огнот во Газа е во сила од 19 јануари, прекинувајќи ја геноцидната војна на Израел во која се убиени над 48.000 Палестинци, главно жени и деца, и која ја остави енклавата во урнатини.

Хамас претходно објави дека ќе го одложи шестото ослободување на заложниците планирано за сабота (утре) поради израелските „прекршувања“ на договорот, но по посредство на Катар и Египет, договорот треба да се спроведе овој викенд како што е договорено.

Трамп предложи да ја преземе Газа, да ги пресели Палестинците во соседните држави и да ја претвори енклавата во „Ривиера на Блискиот Исток“.

Неговиот предлог наиде на широка осуда од арапскиот свет и пошироко.