Adel Abdelrheem
04 Мај 2023•Ажурирај: 05 Мај 2023
КАРТУМ (АА) – Рано утрово се обновени жестоките вооружени судири меѓу суданската армија и паравоените сили во неколку подрачја во главниот град Картум.
Очевидци за Анадолу изјавија дека се слушнале судири во близина на претседателската палата и Генералната команда на суданската армија во центарот на Картум.
Суданската армија соопшти дека нејзините сили се судриле со Силите за брза поддршка (РСФ), кои се обиделе да ја нападнат Командата на армијата во Бахри, соседниот град на Картум.
Во соопштението се додава дека армијата им нанела големи загуби на Силите за брза поддршка (РСФ), принудувајќи ги да се повлечат.
Во меѓувреме, силите ја обвинија суданската армија за судирите, за прекршување на примирјето, како и за напад на станбените населби со артилерија и авиони на, како што нагласија, „кукавички начин“.
Во вторникот, Владата на Јужен Судан објави дека двајцата сопернички генерали во Судан – началникот на армијата, Абдел Фатах ал-Бурхан, и командантот на паравоената РСФ, Мухамед Хамдан „Хемедти“ Дагало, постигнаа договор за седумдневен прекин на огнот што започна од четвртокот.
Од почетокот на судирите на 15 април, според суданското Министерство за здравство, животот го изгубиле над 550 луѓе, а повеќе од 5.000 се повредени.
Во последните месеци постои несогласување меѓу армијата и паравоените сили околу нивната интеграција во вооружените сили, клучен услов во договорот за транзиција на Судан со политичките групи.
Судан е без функционална влада од октомври 2021 година, кога војската ја разреши преодната Влада на премиерот Абдула Хамдок и прогласи вонредна состојба во потег што политичките сили го нарекоа државен удар.
Транзицискиот период на Судан, кој започна во август 2019 година по соборувањето на претседателот Омар ал-Башир, треба да заврши со избори на почетокот на 2024 година.
