Oktaj Omeragikj
20 Јули 2025•Ажурирај: 28 Јули 2025
СКОПЈЕ (АА) - Парламентот на Словенија усвои закон со кој на терминално (неизлечиво) болните возрасни лица им се дава право на потпомогнато самоубиство (да го прекинат својот живот) откако мнозинството гласачи го поддржаа предлогот на референдум, известува Анадолу.
Пратениците го одобрија законот во петокот, со 50 гласови „за“, 34 „против“ и три воздржани, што значи дека потпомогнатото самоубиство ќе биде дозволено во случаи на неподносливо страдање во кое се исцрпени сите опции за лекување.
Правото на потпомогнато самоубиство нема да биде дозволено во случај на неподносливо страдање како резултат на ментална болест.
Усвоениот закон се очекува да стапи на сила во наредните недели.
На консултативниот референдум минатата година, 55 % од Словенците гласаа за потпомогнато самоубиство. Противниците на законот може да се обидат да соберат доволно поддршка за да изнудат уште еден референдум.
Комисијата за медицинска етика на земјата оваа недела изјави дека останува цврста во својот став дека законот носи високи етички ризици и покрај неколкуте амандмани за време на неговото усвојување во парламентот.
Тереза Новак, пратеничка од владејачкото Движење слобода, која го поддржа законот, пред парламентот изјави дека „правото [потпомогнато самоубиство] не претставува пораз за медицината“.
„Би било погрешно медицината да ги лиши луѓето од нивното право да умрат ако сакаат, а медицината не може да им помогне“, рече пратеник на либералите.
Конзервативната Словенечка демократска партија (СДП) го осуди законот, велејќи дека тој „отвора врата кон култура на смртта, губење на човечкото достоинство и минимизирање на вредноста на животот, особено на најранливите“.
Гласањето значи дека оваа централноевропска земја ќе им се приклучи на неколку други кои им дозволуваат на терминално болните луѓе да добијат медицинска помош за да го завршат својот живот, вклучувајќи ги Австралија, Канада, Холандија и Белгија, како и некои сојузни држави во Соединетите Американски Држави.
Минатиот месец, парламентот на Обединетото Кралство гласаше за легализација на потпомогнато самоубиство, иако законот ќе мора да го помине горниот дом на парламентот.
