Семејствата на израелските заложници во Газа блокираа автопат во Тел Авив

КУДС (АА) - Семејствата на израелските заложници држени во Газа, блокираа автопат во центарот на Тел Авив доцна синоќа, пред полицијата насилно да интервенира и да ги растера, пренесува Анадолу.

Десетици демонстранти и роднини на заложниците го блокираа автопатот Ајалон во близина на клучката Хашалом, објави весникот Хаарец.

Полицијата насилно ги отстрани демонстрантите, кои седеа на патот, и уапси двајца членови на семејствата на заложниците, објави весникот.

Во Катар се водат индиректни преговори меѓу Израел и палестинската група на отпорот Хамас со посредство на Катар и Египет. Но, разговорите допрва треба да дадат договор за размена на затвореници.

Хамас, за кој се верува дека држи речиси 130 израелски заложници, бара прекин на тековната офанзива на Израел во Појасот Газа во замена за договор за заложниците со Тел Авив.

Со претходниот договор постигнат во ноември 2023 година беа ослободени 81 Израелец и 24 странци во замена за 240 Палестинци, од кои 71 жена и 169 деца.

Израел започна смртоносна воена офанзива врз палестинската територија по прекуграничниот напад на Хамас.

Во израелските напади оттогаш загинаа над 32.400 Палестинци, а речиси 74.800 се повредени.

Според податоците на Обединетите нации, војната принуди 85 отсто од населението на Газа на внатрешно раселување, предизвика акутен недостиг на храна, чиста вода и лекови, а поголем дел од инфраструктурата на енклавата е оштетен или уништен.

Израел е обвинет за геноцид пред Меѓународниот суд на правдата, кој со привремената одлука во јануари му нареди на Тел Авив да ги запре геноцидните дејства и да преземе мерки за да гарантира хуманитарна помош за цивилите во Газа.