Северна Кореја тестира 4 стратешки крстосувачки ракети

АНКАРА (АА) - Северна Кореја денеска потврди дека нејзините сили еден ден претходно успешно тестирале четири стратешки крстосувачки ракети во источниот регион на земјата, објавија државните медиуми, пренесува Анадолу.

„Четири стратешки крстосувачки ракети „Хвасал-2“ беа лансирани кон Источното Корејско Море од областа Ким Чаек во провинцијата Северен Хамгјонг“, објави Корејската централна новинска агенција.

„Четири стратешки крстосувачки ракети прецизно погодија однапред поставена цел во морето откако патуваа во елипсовидни орбити од 2.000 километри“, се додава во веста на оваа новинска агенција.

Во меѓувреме, Министерството за надворешни работи на Северна Кореја повторно денеска ги осуди САД за користење на Советот за безбедност на Обединетите нации како платформа против Пјонгјанг.

„САД треба интуитивно да ги согледаат и прифатат последиците од ова“, рече Квон Јонг Гун, генерален директор на Одделот за американски работи во Министерството за надворешни работи.