Ali Murat Alhas
15 Февруари 2022•Ажурирај: 16 Февруари 2022
АНКАРА (АА) - Времето што луѓето низ светот го поминуваат на интернет значително се зголеми во текот на пандемијата на Ковид-19, при што трендот не покажува знаци на забавување, покажува новиот извештај, јавува Агенција Анадолија (АА).
Извештајот насловен „ДИЏИТАЛ 2022 - Глобален преглед“, објавен од агенцијата со седиште во Њујорк, „We Are Social“ и компанијата за социјални медиуми „Hootsuite“, нуди увид во дигиталните трендови, вклучително и во времето поминато на интернет на дневно ниво и на платформите за социјални медиуми.
Просечен корисник на интернет на возраст од 16 до 64 поминува шест часа и 58 минути онлајн дневно, според извештајот.
„Јужноафриканците сега поминуваат најголем дел од времето на интернет дневно; корисниците на интернет на работоспособна возраст во земјата велат дека поминуваат во просек 10 часа и 46 минути, користејќи конектирана технологија секој ден“, се вели во извештајот.
По нив следуваат Филипинците, со просек од 10 часа и 27 минути.
„Филипинците и Јужноафриканците исто така имаат значително поголема веројатност да ги користат социјалните медиуми за работа отколку глобалниот просек, со повеќе од една третина од интернет-корисниците на возраст од 16 до 64 во двете земји, кои велат дека социјалните медиуми играат улога во нивните професионални активности“, вели извештајот.
Земјите меѓу кои се Бразил, Колумбија, Аргентина, Малезија, Тајланд, Мексико, Индонезија, ОАЕ, Тајван, Саудиска Арабија, Египет, Турција, Португалија, Русија, Израел, Сингапур, Индија, Романија и САД поминуваат повеќе од просечното време на интернет.
Жителите на Јапонија, од друга страна, поминуваат најмалку време на интернет со дневен просек од четири часа и 26 минути.
Главните причини за користење интернет, според извештајот, се наоѓање информации, комуникација со пријателите и семејството, останувањето во тек со вестите и настаните, гледање видеа, ТВ-шоуа и филмови, истражување како да се прават одредени работи, изнаоѓање идеи или инспирација, пристап и слушање музика, истражување на производи, брендови, пополнување на времето и општо прелистување.
Останатите главни употреби наведени во извештајот се образование и цели поврзани со студии, истражување на места, одмор и патувања, истражување за здравствени проблеми и здравствени производи, управување со финансии и заштеда, играње игри, истражувања поврзани со бизнис, запознавање нови луѓе, организирање на секојдневниот живот, споделување мислења и вмрежување поврзано со бизнисот.
