САД: Џо Бајден се сретна со сопругата и ќерката на Алексеј Навални

ВАШИНГТОН (АА) - Американскиот претседател Џо Бајден се сретна со Јулија Навални, сопругата на рускиот дисидент Алексеј Навални, кој почина во руски затвор, и ќерката Даша, и му понуди поддршка на семејството, јавува Анадолу.

Бајден разговараше со сопругата и ќерката на Навални за време на посетата на Калифорнија, каде што ја продолжува својата предизборна кампања.

„Денес се сретнав со семејството на Алексеј Навални, Јулија и Даша Навални, и им изразив сочувство за оваа катастрофална загуба. Храброто наследство на Алексеј ќе продолжи со Јулија и Даша и со луѓето што се борат за демократија и човекови права низ Русија“, напиша Бајден на социјалната мрежа Х.

Во соопштението на Белата куќа по повод средбата се наведува дека Бајден многу ги ценел постапките на Алексеј Навални во Русија и дека неговата смрт е извор на голема тага.

Бајден во своја претходна изјава тврдеше дека рускиот претседател Владимир Путин е одговорен за смртта на Навални и најави дека денес (петок) ќе објави нови санкции против Москва.