САД: Засега нема итни планови за евакуација на граѓаните од Израел

ИСТАНБУЛ (АА) – Соединетите Американски Држави (САД) синоќа соопштија дека засега немаат најави за помош за евакуација на американските државјани од Израел, иако Амбасадата на САД во Ерусалим подоцна објави дека работи на можности за евакуација поради ескалацијата на конфликтот меѓу Иран и Израел, јавува Анадолу.

„Итно известување! Американските државјани кои сакаат да го напуштат Израел – Амбасадата на САД работи на евакуациски летови и заминување со крузери“, напиша американскиот амбасадор во Израел, Мајк Хакаби, на социјалната мрежа Х доцна синоќа.

Тој ги повика граѓаните да се регистрираат во Програмата за регистрација на патници (STEP) за да добиваат најнови информации.

Но, девет часа претходно, Амбасадата на САД во Ерусалим на Х објави дека „нема никаква најава“ за помош при евакуација на државјани, додавајќи дека Стејт департментот „секогаш планира сценарија за да им помогне на американските државјани да ја напуштат кризната зона.“

По ова соопштение, останува нејасно дали и кога ќе бидат достапни евакуациски летови или крузери, имајќи предвид дека аеродромот Бен Гурион и сите израелски пристаништа се сè уште затворени.

Претходно, американскиот претседател Доналд Трамп изјави дека сè уште не одлучил дали ќе ја ангажира американската војска да се приклучи на израелската офанзива против Иран, велејќи: „Можеби ќе го сторам тоа. Можеби нема.“

Регионалните тензии ескалираа од петокот, кога Израел започна воздушни напади врз повеќе локации низ Иран, меѓу кои и воени и нуклеарни објекти, што го натера Техеран да започне одмазднички напади.

Израелските власти соопштија дека најмалку 24 лица се загинати, а стотици се повредени оттогаш во иранските ракетни напади.

Во израелските напади врз Иран загинале 585 лица, а над 1.300 се ранети, според јавувањата на иранските медиуми.