Рускиот министер за одбрана пристигна во Иран во услови на ескалацијата во регионот Карабах во Азербејџан

МОСКВА (АА) - Рускиот министер за одбрана денес пристигна во Техеран на разговори со иранското раководство токму кога ситуацијата во блискиот Карабах ескалираше, при што Азербејџан најави почеток на „антитерористичките“ мерки во регионот, јавува Анадолу.

Посетата на Сергеј Шојгу е со цел да помогне во зајакнувањето на руско-иранските воени врски и ќе биде важна за развојот на соработката меѓу двете земји, се вели во соопштението на руското Министерство за надворешни работи.

Односите меѓу Азербејџан и Иран неодамна беа нарушени, делумно поради поддршката на Техеран за соседна Ерменија и нападот во јануари оваа година врз Азербејџанската амбасада во Техеран, главниот град на Иран.

Русија е сојузник на Ерменија во Организацијата на Договорот за колективна безбедност, но раководството на земјата неодамна направи чекори што ја доближуваат до САД, главниот ривал на Москва.

Тензиите меѓу Азербејџан и Ерменија започнаа во 1991 година кога ерменската војска го окупираше Нагорно Карабах, територија меѓународно признаена како дел од Азербејџан, и уште седум соседни региони.

Есента 2020 година, Азербејџан ослободи неколку градови, села и населби од ерменската окупација во текот на 44-дневните судири. Војната заврши со прекин на огнот со посредство на Русија.

Тензиите меѓу двете нации, сепак, продолжуваат и покрај тековните разговори за долгорочен мировен договор.