Русија не очекува промена во политиката на Велика Британија по оставката на Џонсон

МОСКВА (АА) - Русија денеска соопшти дека не очекува промена во односот на Обединетото Кралство кон Русија, откако британскиот премиер Борис Џонсон поднесе оставка, јавува Агенција Анадолија (АА).

Говорејќи на брифингот со новинарите во Москва, портпаролот на Кремљ, Дмитриј Песков, изрази надеж дека еден ден на власт во Велика Британија ќе дојдат „повеќе професионални луѓе“ кои ќе можат да ја разберат предноста од решавањето на постоечките проблеми преку дијалог. „Засега тешко можеме да се надеваме на ова“, се пожали тој. „Велика Британија доживува политичка криза.“

Песков рече дека граѓаните на Велика Британија треба да ги проценат перформансите на Џонсон, тврдејќи дека британскиот политички систем е компликуван, па дури и лице кое нема поддршка од народот може да остане на власт.

„Човек кој воопшто нема јавна поддршка може да ја води Владата. На оваа категорија, очигледно, припаѓа и г. Џонсон“, рече тој.

Џонсон поднесе оставка денеска, откако неговата влада беше потресена од серија оставки во последните два дена.

Осврнувајќи се на ситуацијата во руската полуексклава Калининград, која минува низ криза предизвикана од забраната на Литванија за транзит на стоки преку нејзините територии во рамки на санкциите, Песков најави реципрочна забрана за извоз преку балтичките земји.

„Рускиот претседател Владимир Путин не планира да го посети регионот во оваа фаза“, додаде тој.

Што се однесува до одлуката на Путин за учество на Самитот на Г-20 во Индонезија, Песков рече дека одлуката ќе биде донесена поблиску до датумот на настанот.