Burç Eruygur
11 Јуни 2025•Ажурирај: 12 Јуни 2025
ИСТАНБУЛ (АА) – Русија и Украина денес ја потврдија првата размена на тела на загинати војници како дел од договорот постигнат на мировните преговори што се одржаа минатата недела во Истанбул, јавува Анадолу.
На 2 јуни Истанбул беше домаќин на втората рунда руско-украински мировни преговори, по првата рунда што се одржа на 16 мај.
Во рамките на последната средба двете страни се согласија на зголемување на размената на воени заробеници – со приоритет на најмладите и најтешко повредените – и враќање по 6.000 тела на војници од секоја страна.
Според соопштението на украинскиот Координационен штаб за третман на воени заробеници, „во рамките на мерките за репатријација вратени се телата на 1.212 украински бранители“.
Телата што ѝ се вратени на Украина се на војници што се бореле во регионите Харков, Луганск, Доњецк, Запорожје и Херсон, како и од руската гранична област Курск, каде што Украина спроведе офанзива во август минатата година.
Во април Русија соопшти дека целосно ги избркала украинските сили од Курск и дека оттогаш зазела неколку населени места во североисточниот регион Суми, кој се граничи со Курск.
Киев ги негираше овие тврдења, но призна дека состојбата на терен е „тешка“.
Украинските власти соопштија дека враќањето на телата е резултат на координирана работа на неколку државни институции и изразија благодарност до Меѓународниот комитет на Црвениот крст за поддршката.
„Истражители од безбедносните служби заедно со експертски институции на Министерството за внатрешни работи ќе работат на идентификација на телата колку што е можно поскоро“, се наведува во соопштението.
Во подоцнежна објава на Телеграм рускиот претседателски советник Владимир Медински потврди дека започнала размената на тела во согласност со договорот постигнат во Истанбул. Тој наведе дека Москва ѝ предала на Украина 1.212 тела, а Киев на Русија 27 тела на руски војници.
„Утре започнуваме и со итни 'санитарни размени' на тешко повредени заробеници од првите борбени линии“, додаде Медински.
