Русија тврди дека Украина погодила 7 точки и објекти на енергетската инфраструктура

ИСТАНБУЛ (АА) - Русија денес соопшти дека Украина извршила напади врз седум точки на нејзината енергетска инфраструктура и објекти во изминатиот ден, јавува Анадолу.

Минатиот месец, Соединетите Американски Држави (САД) посредуваа во два договори меѓу Русија и Украина, еден за „осигирување безбедна пловидба“ во Црното Море и друг за 30-дневен прекин на нападите врз енергетската инфраструктура, стапија на сила по разговорите во Саудиска Арабија.

И покрај договорите, двете страни често меѓусебно се обвинуваат за кршење на прекинот на напади врз енергетската инфраструктура.

Во соопштението на Министерството за одбрана се вели дека во украински напади вчера биле погодени енергетски објект и две високонапонски линии во пограничниот регион Брјанск, како и друга високонапонска линија на полуостровот Крим, кој Москва нелегитимно го анектира во 2014 година.

Во текот на ноќта, високонапонска линија во Ростовската Област е исклучена поради напад на украински дрон, се вели во соопштението.

Се наведува дека гасоводот за дистрибуција на гас под низок притисок во сопственост на рускиот енергетски гигант „Гаспром“ во регионот Воронеж, утрово бил погоден двапати.

„Од моментот кога (украинскиот претседател Владимир) Зеленски објави дека режимот во Киев, наводно, го почитува договорот за прекин на нападите врз руската енергетска инфраструктура од 18 март оваа година, всушност, Украинските вооружени сили не ги прекинаа нападите врз руските енергетски објекти ниту еден ден“, соопшти Министерството.

Украинските власти не ги коментираа тврдењата на Русија.