Русија го осуди израелскиот напад врз Сирија и апелира да се прекинат нападите

МОСКВА (АА) - Русија денеска го повика Израел да ги прекине нападите врз Сирија, велејќи дека нападите се „категорично неприфатливи и недозволиви“, јавува Агенција Анадолија (АА).

Говорејќи на прес-конференцијата во Москва, портпаролката на Министерството за надворешни работи, Марија Захарова, остро ги осуди израелските акции, нагласувајќи дека тие го прекршуваат меѓународното право.

„Бараме израелската страна да престане со оваа злобна и опасна практика. Сметаме дека е неопходно да нагласиме дека тековното израелско гранатирање на територијата на Сирија е кршење на основните права на меѓународното право, тоа е категорично неприфатливо и недозволиво.“

„Силно ги осудуваме ваквите неодговорни дејствија кои го зголемуваат бројот на жртви меѓу војниците и цивилите и претставуваат реална закана од неконтролирана ескалација на тензиите во регионот“, нагласи Захарова.

Портпаролката рече дека израелските напади го ослабуваат борбениот потенцијал на Сириските вооружени сили и негативно влијаат на напорите за борба против тероризмот на сириска територија.

Претходно, извор од сириската војска изјави дека Израел нападнал област во близина на меѓународниот аеродром јужно од главниот град Дамаск, при што загинале четворица сириски војници, а тројца се повредени.

Во извештајот на медиумите се тврди дека загинале и пет борци на шиитското движење Хезболах, кои се бореле на страната на Сириската армија против терористичките групи.

Ова е деветти израелски напад врз Сирија од почетокот на годинава.