Протестите завршија, Владата на Ирак ја одложи одлуката за предавање на воената зграда на партијата КДП во Киркук

КИРКУК (АА) – Одлуката за предавање на зградата што ја користат заедничките оперативни команди во Ирак на Курдистанската демократска партија (КДП) е одложена и демонстрациите се прекинати, јавува Анадолу.

Гувернерот на Киркук, Ракан Саид ал-Џабури, утринава преку Фејсбук соопшти дека прашањето за предавање на зградата во Киркук, која ја користат силите лојални на Централната влада на Ирак, на КДП, е одложено како резултат на неговиот телефонски разговор со ирачкиот премиер Мухамед Шија ал-Судани.

Ал Џабури рече дека разговарал со демонстрантите пред зградата и им кажал за наредбата на Ал Судани за одложувањето, по што демонстрантите решија да ги спакуваат своите шатори, да го прекинат протестот и да го отворат блокираниот пат.

Портпаролот на полициската управа во Киркук, Амир Нури, за Анадолу изјави дека во немирите за време на протестот животот го загубиле три лица, а најмалку девет се повредени.

Началникот на ирачкиот Генералштаб, Абдел Емир Јарала, пристигна во Киркук за време на немирите и одржа состанок со локалните власти.

Минатата недела во Киркук избувнаа протести против владината одлука да ја предаде зградата на КДП, политичка партија која тврди дека претходно го користела тој објект и дека има право на негово враќање.

Силите на Пешмерга на Курдската регионална влада (КРГ) се распоредени во базите евакуирани од ирачката војска во Киркук по појавата на терористичката организација ДЕАШ во 2014 година.

Силите на Владата на Ирак влегоа во Киркук во 2017 година, ставајќи крај на присуството на Пешмерга во градот.