Поранешниот израелски министер за одбрана повика на изградба на засолништа во случај на војна со Иран

ЕРУСАЛИМ (АА) – Поранешниот израелски министер за одбрана Авигдор Либерман денес повика на итна подготовка и изградба на безбедни засолништа за милиони граѓани, во случај да избие војна со Иран, пренесува Анадолу.

„Мораме уште сега да се подготвиме и да воспоставиме безбедни места за милиони луѓе кои немаат соодветно засолниште“, изјави Либерман, лидер на десничарската партија „Јисраел Бејтену“, за локалното радио 103 ФМ.

Тој, сепак, истакна дека одлуката за евентуална војна со Иран е во рацете на американскиот претседател Доналд Трамп.

„Се наоѓаме во фаза кога државата Израел мора да се смири и да почека“, рече Либерман, додавајќи дека Израел има „мала можност да влијае врз претседателот Трамп, бидејќи тој ги носи судбоносните одлуки“.

Израел внимателно го следи американското распоредување војници во регионот и ги очекува резултатите од најавените преговори меѓу САД и Иран, што треба да започнат в петок.

Израелските власти изразуваат страв дека Иран би можел да изврши ракетен напад доколку САД започнат воена акција против Техеран.

Притисокот од Вашингтон и Тел Авив врз Иран е засилен во последните недели, по избувнувањето на антивладините протести во земјата кон крајот на декември.

Иранските власти ги обвинија САД и Израел дека ги поддржуваат, како што ги нарекуваат, „бунтовниците“ и „терористите“ кои извршувале насилни дејства за време на протестите. Техеран, исто така, најави одмазда во случај на каков било напад.

САД и Израел го обвинуваат Иран дека се обидува да произведе нуклеарно оружје, додека Техеран тврди дека неговата нуклеарна програма е наменета за мирољубиви цели, вклучително и производство на електрична енергија.