РИМ (АА) - Црковните власти и владините институции во Италија отворија истрага по наводите дека ликот на премиерката Џорџа Мелони се појавил на фигура на ангел за време на реставрацијата на фреска во Рим, јавува Анадолу.

Министерството за култура на Италија испрати инспектори за да ја испитаат фреската што се наоѓа во капелата во Базиликата „Сан Лоренцо ин Лучина“. Римската бискупија изрази незадоволство од инцидентот, наведувајќи дека ќе се обиде да ги идентификува одговорните за процесот на реставрација.

Уметникот Бруно Валентинети ги отфрли тврдењата дека ликот на ангелот е моделиран според Мелони, појаснувајќи дека само ја реставрирал фреската што самиот ја насликал во 2000 година.

Реагирајќи на контроверзијата, премиерката Мелони на Инстаграм истакна дека таа „сигурно не е ангел“, додавајќи и емотикон со смеа.

Реставрираната фреска во историската Базилика „Сан Лоренцо ин Лучина“ во Рим предизвика јавна дебата во саботата, на 31 јануари, откако се појавија тврдења дека една од ангелските фигури наликува на премиерката.

Според весникот „Ла Република“, базиликата неодамна била подложена на реставрација, при што изразот на лицето на една од фреските привлекол внимание поради наводната сличност со Мелони.

По медиумските извештаи, голем број посетители наводно се упатиле кон базиликата за да ја видат фреската.