Seyit Aydoğan
14 Јули 2021•Ажурирај: 15 Јули 2021
ТОРОНТО (АА) - Националниот самит за исламофобија, на кој ќе се разговара за исламофобијата, што значително се зголеми во последните години против муслиманската заедница во Канада, ќе се одржи в четврток, на 22 јули, пренесува Агенција Анадолија (АА).
Бардиш Чагер, канадската министерка за инклузивност, во писменото соопштение на оваа тема истакна дека Федералната влада ќе свика два одделни национални самита, Националниот самит за антисемитизам кој ќе се одржи на 21 јули и Националниот самит за исламофобија на 22 јули.
„На овие самити ќе се собере група од различни заедници и политички лидери, академици, активисти. Учесниците заедно ќе продолжат да изготвуваат мапа на патот за борба против расизмот и дискриминацијата“, нагласи Чагер.
Меѓу другото, министерката во писмената изјава додава:
„Разновидноста во Канада е една од нашите најголеми предности. Но, ние забележуваме дека омразата поттикната од расизам и дискриминација им нанесува неприфатлива штета на нашите заедници. Од оваа причина, ние мора активно да ги слушаме гласовите на заедниците директно погодени од расизам.“
- По терористичкиот напад во градот Лондон, изразени барања за одржување самит -
Во градот Лондон во канадската покраина Онтарио, на 6 јуни, возач на минибус, управувајќи со своето возило влета во пешаци на тротоар, убивајќи четири лица од исто семејство.
Напаѓачот го уби 74-годишниот Талат Афзаал, неговиот 46-годишен син Салман Афзаал, 44-годишната сопруга на синот, Мадиха Салман и нивната 15-годишната ќерка Јумна Салман.
Во изјавата дадена од лондонската полиција беше наведено дека нападот бил извршен затоа што семејството било муслиманско.
- Националниот совет на канадските муслимани (NCCM) повика на организирање самит -
По овој напад, Омар Камиса, директорот на Националниот совет на канадските муслимани (NCCM), повика на организирање на Национален самит за исламофобија.
Во изјавата за дописникот на АА, Камиса рече:
„Ние повеќе немаме сила да ја поднесеме оваа болка. Не можеме повеќе да дозволиме оваа болка секој ден да ни го уништува животот. Треба веднаш да дејствуваме против дискриминацијата и расизмот. Не утре, не следната недела или следната година, туку денес, сега и веднаш. Ние мора да го сториме ова што е можно побрзо за нашите деца, за нашите семејства, за нашата иднина.“
Омар Камиса, директорот на Националниот совет на канадските муслимани (NCCM), исто така, додаде:
„Ги повикуваме водачите и лидерите на заедниците од сите религии и слоеви на животот, веднаш да свикаат национален самит за прашањата како што се исламофобично насилство, тероризам и дискриминација.“
