БРИСЕЛ (АА) – Полскиот премиер ја прогласи 2026 година за „година на забрзување во Полска“, ветувајќи дека ќе изгради „најсилна армија во Европа“, ќе ги зголеми инвестициите во инфраструктурата и ќе заземе построг став кон криминалот, објавија локалните медиуми, пренесува Анадолу.

Во новогодишното обраќање Доналд Туск рече дека неговата Влада ќе ја забрза воената експанзија, ќе започне големи инфраструктурни проекти и ќе продолжи со она што го нарече „реполонизација“ и обнова на клучните индустрии, вклучително и одбранбениот сектор, објави ТВП Ворлд.

„Ќе ја забрзаме изградбата на најсилната армија во Европа. Ќе ги забрзаме големите инвестиции во инфраструктурата. Ова ќе биде година на брзо освојување на Балтичкото Море“, рече Туск.

Тој, исто така, најави планови за воведување строго правило „Полска на прво место“ во јавните набавки.

Туск вети построги мерки против криминалот, велејќи дека властите ќе извршат притисок врз криминалците „од сите видови“, вклучително и дилерите на дрога, корумпираните политичари и она што тој го опиша како проруски милитанти.

„Секој, без исклучок, кој ќе го прекрши законот, горчливо ќе се кае за тоа наредната година“, рече тој, додавајќи дека Полска ќе стане „оаза на безбедност“.

Осврнувајќи се на 2025 година, Туск ја опиша изминатата година како пресвртница за земјата и покрај глобалната нестабилност.