Подготовки за празникот Новруз во Иран, кој се слави како Нова година

Граѓаните во Иран излегоа да пазаруваат пред претстојниот празник Новруз, известува Анадолу.

Новруз го означува првиот ден на пролетта и почетокот на годината според иранскиот календар.

Подготовките за празникот предизвикаа раздвиженост на пазарите во Техеран, а улиците на главниот град се украсени со декорирани јајца, кои се симбол на празникот Новруз.

- Празникот Новруз

Новруз, кој се слави во март, за многу луѓе е предвесник на пролетта и симбол на мирот, радоста и единството. Тој почнува со пролетната рамноденица која најчесто е на 21 март, или ден порано или подоцна. Моментот кога Сонцето еклиптички го пресекува небесниот екватор прецизно се пресметува секоја година. Обичај на иранските семејства е да се соберат и да го набљудуваат тој настан.

Празник Новруз е поврзан со разни легенди за повторното раѓање на природата и раѓањето нови надежи за луѓето. Често се практикуваат и разни молитвени обреди за подобра иднина на поединците и на човештвото.

За време на Новруз, луѓето се собираат, особено семејствата и пријателите, во своите домови или на улица.

Прво се посетуваат домовите на најстарите членови на семејството. Луѓето за време на празникот се среќаваат и разменуваат подароци, а на зајдисонце се организира голема гозба со музика и танци.

Во 2016 година, Новруз е вклучен на листата на УНЕСКО за нематеријално културно наследство на човештвото, како културно наследство на Авганистан, Азербејџан, Индија, Иран, Ирак, Казахстан, Киргистан, Узбекистан, Пакистан, Таџикистан, Туркменистан и Туркије.