Повеќе од 6 месеци британска активистка пешачи собирајќи средства за Палестинците

- Фатих ТУРКЈИЛМАЗ​​​​​​​

Британската активистка Рут Херберт пешачи од Велика Британија кон Истанбул собирајќи средства наменети за медицинска помош за Палестинците, известува Анадолу.

На 2 мај 2025 година 52-годишната Херберт тргнала од својот дом во Арнсајд, во Велика Британија, патувала низ Франција, Швајцарија, Италија, Словенија, Црна Гора, Албанија, Северна Македонија и Грција пред да пристигне во Турција.

Херберт својот шест и полмесечен марш, кој го нарекува „Голем марш за Палестина“, ќе го заврши во Истанбул во сабота, на 15 ноември.

Херберт, која досега собрала приближно 50.000 британски фунти (56.570 евра), разговараше со новинарот на Агенција Анадолу за тоа како ја започнала кампањата, за нејзините цели и со што се соочила по патот.

„Она што ме мотивираше да го направам ова беа страдањата на Палестинците кои ги видов и сакав да сторам нешто. Присуството на демонстрации беше многу вообичаено, но чувствував дека тоа не е доволно. Посакав да ја поддржам хуманитарната организација 'Медицинска помош за Палестинците'.“

Изразувајќи ја својата желба да направи повеќе за палестинскиот народ, Херберт рече дека сака да се запознае со луѓето во Европа и низ целиот свет што ја поддржуваат палестинската борба.

„Гледањето на ужасните слики од Газа длабоко го повреди целото човештво. Сакав да го изодам овој пат за да се излекувам себеси и да придонесам за физичкото и духовното лекување на Палестинците. Минаа шест и пол месеци, а моето патување завршува во сабота во Истанбул“, рече Херберт.

Таа рече дека во овој потфат била поддржана од голем број пријатели во Ланкастер.

„Потребни ни се мир и правда за Палестина“, рече Херберт, повикувајќи на долгорочна борба за Палестина.

„Мислам дека кога сите правиме нешто, заедно формираме бран. Како што тој бран расте, така сѐ повеќе и повеќе луѓе се вклучуваат и чувствуваме дека не сме сами. Секој отпор, секоја борба бара време. Таа мора да биде долгорочна, мора да се потрудиме“, посочи таа.

Нагласувајќи дека овие работи нема да се случат преку ноќ, туку мора да продолжат со решителност, Херберт истакна:

„Мислам дека Палестина ја тестира нашата човечност. Начинот на кој се однесуваме кон Палестина покажува како ќе влијаеме врз целата планета и врз светот.“

Таа истакна дека за време на патувањето минала низ 12 земји, запознавајќи се со различни луѓе и била сведок на голем број акти на великодушност по патот, вклучително бесплатни оброци и сместување.

Херберт рече дека речиси ја достигнала својата цел за донација од 50.000 фунти за медицинска помош за Палестинците.

„Враќањето дома ќе биде голема промена и се обидувам да се подготвам за тоа. Ова го правам 6 месеци и враќањето дома веројатно ќе биде малку стресно. Но план ми е дома да се вратам со воз“, рече Херберт.