Zuhal Demirci
13 Март 2024•Ажурирај: 14 Март 2024
ЛОНДОН (АА) - Пејачката и текстописец Шарлот Чрч, која учествуваше на собирот за солидарност за Палестина во Лондон, објави дека нејзиното семејство добило закани поради поддршката за Газа, јавува Анадолу.
Пејачката, родена во Велс, по собирот, на кој присуствуваше изминатиот викенд, објави дека сака да одговори на обвинувањата и клеветите против неа за учеството на пропалестинскиот настан.
Истакна дека поради нејзината поддршка за Газа обвинета е дека е „антисемит“ и „предавник“.
Оваа 38-годишна пејачка рече дека апсолутно не прифаќа такви обвинувања.
Како што рече, била изложена на сите форми на насилни, мизогени и расистички коментари на социјалните мрежи и обвинета е дека е екстремист само поради учеството на собирот за солидарност со Палестина.
Таа додаде дека многумина во медиумите и на социјалните мрежи ја обвинуваат дека е „антисемит“ откако присуствувала на собирот за да соберат пари за купување ново амбулантно возило за болница во Газа.
Таа нагласува дека никогаш не била ниту, пак, ќе биде антисемит иако, како што рече, ја исмеваат и ја навредуваат некои моќни и познати лица само затоа што се противи на израелските ѕверства во Газа и на Западниот Брег и соучеството на Западот во овие злосторства.
„Мојата лична сигурност и безбедноста на моето семејство ги загрозуваат некои прилично опасни луѓе охрабрени од реториката на политичарите и кукавичкото, неодговорно известување дури и на некои либерални медиуми“, рече таа.
Истакна дека чувствува потреба да одговори на нападите насочени против нејзината личност.
„Мора да зборувам затоа што кампањата со која се повикува на прекин на израелската агресија во Палестина од почетокот на геноцидот доби многу мало медиумско внимание, освен што е окарактеризирана како 'омраза' или 'исламистичка'“, рече Чрч.
Пејачката учествуваше на маршот за поддршка на Палестина што се одржа во Лондон на 9 март, а потоа пееше за палестинскиот народ на бината поставена во близина на американската амбасада во Лондон.
Чрч се стекна со слава во своето детство како пејачка на класична музика пред да се сврти кон поп-музиката во 2005 година. До 2007 година таа продаде повеќе од десет милиони плочи низ светот, над пет милиони во Соединетите Американски Држави (САД).
