Петмина сириски војници убиени во израелски воздушен напад врз либанско-сириската граница

АНКАРА (АА) - Петмина сириски војници се убиени во израелскиот воздушен напад, чија цел била воена локација на сириско-либанската граница рано утринава, јави сириската државна новинска агенција САНА, пренесува Анадолу.

Агенцијата цитираше сириски воен извор што вели дека „денес, приближно во 01:35 часот, израелскиот непријател изврши воздушен напад од правец на окупираната Голанска Висорамнина, гаѓајќи една од нашите воени локации на сириско-либанската граница, во близина на Кфеир Јабус во руралното подрачје на Дамаск“.

„Во нападот убиени се пет војници, додека повреден е еден“, додаде неименуваниот извор.

Ова е последниот во серијата израелски напади врз сириските воени позиции, особено по должината на пограничните региони.

Израел сѐ уште не го коментира нападот.

Нападот дополнително ги ескалираше тензиите во регионот бидејќи либански Хезболах и Израел се вклучени во прекугранична војна од почетокот на израелската војна против Газа, во која загинаа повеќе од 41.500 луѓе, повеќето жени и деца, по прекуграничниот напад на Хамас во октомври минатата година.