Петмина новинари убиени во израелски напад близу болница во Газа

ИСТАНБУЛ (АА) - Петмина новинари од каналот „Ал-Кудс Денес“ се убиени рано утрово во израелскиот воздушен напад врз нивното телевизиско комбе во близина на болницата „Ал-Авда“ во бегалскиот камп Нусејрат во Газа, соопштија палестинските власти и медиуми, јавува Анадолу.

Новинарите известуваа за настаните во болницата кога е погодено возилото означено со натпис „ПРЕС“, со големи црвени букви.

Жртвите се идентификувани како Фади Хасуна, Ибрахим ал-Шеик Али, Мухамед ал-Ладах, Фајсал Абу ал- Кумсан и Ајман ал-Џади.

Дописникот на Ал Џезира, Анас ал-Шариф, објави дека Ал-Џади ја чекал својата сопруга, која била на породување со нивното прво дете, пред болницата во моментот на нападот.

На снимката од местото на нападот се гледа дека комбето е зафатено од пламен, а тимовите на цивилната одбрана работат на извлекување на телата и гаснење на пожарот.

Израелската војска го потврди нападот велејќи дека цел било возило со припадници на Исламски џихад.

„Пред нападот беа преземени многу чекори за да се намалат шансите да им се наштети на цивилите, вклучително и употребата на прецизно оружје, воздушни набљудувања и дополнителни разузнавачки информации“, се вели во објавата на војската на платформата X.

Комитетот за заштита на новинарите (CPJ) го осуди нападот, повикувајќи на одговорност.

Израел ја продолжи геноцидната војна во Газа во која загинаа речиси 45.400 Палестинци, повеќето жени и деца, по прекуграничниот напад на палестинската група Хамас на 7 октомври 2023 година.

Минатиот месец Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел се соочува и со случај за геноцид пред Меѓународниот суд на правдата поради неговите постапки во Газа.