Петмина загинати, десетици повредени во израелски напад на училиште со раселени Палестинци во Јужна Газа

АНКАРА (АА) - Најмалку петмина Палестинци загинаа, а десетици се повредени во израелски воздушен напад, чија цел беше училиште во кое се засолнети раселени Палестинци во Хан Јунис во јужниот дел на Газа, објавија палестинските медиуми, пренесува Анадолу.

Палестинската новинска агенција Вафа јави дека „пет лица загинаа, а десетици се повредени во израелското бомбардирање рано утрово на училиште каде што е засолнето раселеното население во Хан Јунис, јужниот дел на Појасот Газа“.

Новинската агенција претходно објави дека „најмалку четворица Палестинци, меѓу кои и деца, загинаа, а повеќемина се повредени во израелското бомбардирање на куќата на семејството Ебу Наср во западниот дел на Хан Јунис“.

Во израелско артилериско гранатирање на неколку населби во Хан Јунис синоќа загинати и повредени се десетици Палестинци, објави Вафа.

Цел на напади беа и многу станбени населби и домови во Деир ал Балах, градот Газа, Нусејрат и Џабалија, во кои повредени беа повеќемина Палестинци.

Израел го бомбардира Појасот Газа од воздух и од копно, воведе опсада и изврши копнена офанзива како одмазда за прекуграничниот напад на Хамас на 7 октомври.

Досега во израелските напади врз Газа загинати се најмалку 18.787 Палестинци, а 50.897 се повредени, според податоците на здравствените власти на Газа.

Според официјални податоци, бројот на загинати Израелци во нападот на Хамас изнесува 1.200, а 135 заложници сè уште се држат од палестинските групи во Газа.