Парламентот на Германија ги ратификува протоколите за членство на Финска и Шведска во НАТО

БЕРЛИН (АА) - Германскиот Бундестаг го усвои Предлог-законот кој го вклучува протоколот за членство во НАТО на Шведска и Финска, јавува Агенција Анадолија (АА).

Социјалдемократската партија (SPD), Зелените, Слободната демократска партија (FDP), Партиите за христијанско единство (CDU-CSU) и Алтернативната партија за Германија (AfD) дадоа целосна поддршка за членството на Шведска и Финска во НАТО.

Од друга страна, Левичарската партија (Die Linke) беше против Законот за ратификација на протоколот.

Германската министерка за одбрана, Кристин Ламбрехт, истакна дека чекорот што го преземаат Финска и Шведска е значаен, правилен и заслужува поддршка.

„Северното и источното крило на НАТО добиваат одлучувачка моќ. Со приемот на Финска и Шведска во НАТО ја зајакнуваме слободата и демократијата. Пристапувањето, не само што го зголемува бројот на членките на Алијансата, туку и ја зголемува солидарноста и единството во Европа и трансатлантскиот дел. Со тоа ги одвраќа оние кои сакаат да го нарушат ова единство.“

Тобијас Линднер, државниот министер во германското Федерално министерство за надворешни работи, рече: „Планираното учество на Финска и Шведска во Северноатлантската одбранбена алијанса е од огромно значење за нас и нашите партнери, со оглед на шоковите што ги доживеавме во Европа и светот од руската војна против Украина. Денеска ги зајакнуваме демократските вредности на НАТО.“