Палестинскиот премиер повика на итен прекин на огнот во Газа и влез на хуманитарна помош

Палестинскиот премиер Мохамад Мустафа денес повика на итен прекин на огнот во Појасот Газа и итно овозможување влез на хуманитарна помош за да се ублажи страдањето на цивилното население, јавува Анадолу.

Говорејќи на прес-конференцијата по состанокот на Арапско-исламскиот министерски комитет за Газа, што се одржа на маргините на Форумот за дипломатија во Анталија, Туркије, Мустафа ја нагласи итната потреба од запирање на насилствата.

„Мора веднаш да се воспостави прекин на огнот во Газа и да се осигури испораката на хуманитарна помош“, изјави премиерот.

Тој додаде дека во тек е развивање на план за обнова на Газа, кој е од суштинско значење за долгорочна стабилност во регионот.

На Форумот за дипломатија во Анталија, што се одржува на тема „Враќање на дипломатијата во фрагментиран свет“, а ќе трае до недела, учествуваат лидери, дипломати и носители на политики од целиот свет.

Израелската армија ја обнови офанзивата врз Газа на 18 март, и покрај прекинот на огнот и договорот за размена на затвореници што беше постигнат на 19 јануари.

Од 7 октомври 2023 година, кога започна израелската воена кампања по нападите на Хамас, во Газа убиени се над 50.900 Палестинци, поголемиот дел жени и деца.

Израел ја користи храната и меѓународната хуманитарна помош како средство за колективен притисок врз палестинскиот народ. Испораката на помош беше запрена на 2 март, само неколку часа по завршувањето на првата фаза од 42 дена на прекинот на огнот.