Палестинка и нејзините две деца се убиени во израелски напад врз Газа

ГАЗА (АА) - Една Палестинка и нејзините две деца беа убиени во израелскиот ракетен напад врз северниот град Беит Лахија денес, изјави медицински извор, јавува Анадолу.

Цел на нападот било семејство пред портата на болницата „Камал Адван“, додаде изворот.

Очевидци рекоа дека израелско беспилотно летало испукало проектил кон семејството надвор од медицинската установа.

Од 5 октомври Израел започна голема копнена операција во северниот дел на Газа за наводно да го спречи прегрупирањето на палестинската група на отпорот Хамас.

Палестинците, сепак, го обвинуваат Израел дека сака да ја окупира областа и насилно да ги исели нејзините жители.

Оттогаш речиси и не е дозволена хуманитарна помош, вклучително храна, лекови и гориво, во областа, оставајќи го преостанатото население во областа на раб на глад.

Според палестинските здравствени власти, оттогаш во северниот дел на Газа убиени се речиси 4.000 луѓе.