Основачот на „Вагнер“: Путин греши по прашањето за предавство, ние сме патриоти

ИСТАНБУЛ (АА) – Основачот и шеф на паравоената група „Вагнер“, Евгениј Пригожин, денес го отфрли обвинувањето на рускиот претседател Владимир Путин кон групата за предавство, пренесува Анадолу.

„Во врска со предавството на татковината, претседателот (Путин) многу греши. Ние сме патриоти на нашата татковина. Се боревме и се бориме, сите борци на ПВК 'Вагнер' и никој нема да се предаде на барање на претседателот, ФСБ или на некој друг“, рече Пригожин во аудиопораката на „Телеграм“.

Пригожин понатаму рече дека нема да се предадат бидејќи не сакаат земјата „да продолжи да живее во корупција, измама и бирократија“.

„Кога се боревме во Африка, ни беше кажано дека ни треба Африка… Кога ни кажаа дека сме во војна со Украина, отидовме и се боревме. Но се покажа дека муницијата, оружјето, сите пари што им се ставени [на располагање] се украдени и ги чуваат за себе, за случај, како денешниот, кога некој оди кон Москва“, рече тој.

Тој подоцна ја обвини руската војска дека цели кон области со цивили затоа што „не можат да ја погодат (целта), гаѓаат насекаде“.

„Затоа ние сме патриоти, а оние што ни се спротивставуваат денес се оние собрани околу никаквеци“, додаде тој.

Путин го обвини Пригожин за предавство во денешното обраќање до нацијата откако силите на паравоената група ја преминаа границата од регионите во Украина под руска контрола и влегоа во градот Ростов.

Пригожин последните месеци континуирано ја обвинува Русија дека не испорачува доволно оружје за паравоената група што се бори заедно со руската армија во Украина.