Канада и САД ќе ја истражат катастрофата со подморницата „Титан“

ТРЕНТОН (АА) – Соединетите Американски Држави (САД) ќе отворат истрага за исчезнувањето на „Титан“, а Канада одделно соопшти дека ќе ги испита дејствата на „Поларен принц“, канадскиот брод што ја влечеше подморницата до местото каде што се остатоците на потонатиот брод „Титаник“ во Атлантскиот Океан, јавува Анадолу.

Американскиот Национален одбор за безбедност на сообраќајот рече дека Американската крајбрежна стража ќе го истражи исчезнувањето на подморницата.

Во меѓувреме, Одборот за безбедност на сообраќајот на Канада соопшти дека ќе започне истрага за постапките на бродот за поддршка „Поларен принц“ што ја влечеше „Титан“ од Њуфаундленд до местото на остатоците од „Титаник“ во Атлантскиот Океан.

Одборот истакна дека неговото дејствување е „во согласност со канадскиот Акт за транспортни несреќи, истрага и безбедност и меѓународните договори“.

„Во наредните денови ќе ги координираме нашите активности со другите вклучени агенции“, се вели во соопштението.

„Поларен принц“ е брод од Њуфаундленд во сопственост на „Miawpukek First Nation“ („Маупуке Фрст Нејшн“).

Бродот им се придружи на другите бродови во потрагата по „Титан“. На него се наоѓале и некои членови од семејствата на петтемина мажи што ги загубија животите при имплозијата на подморницата.

Директорот на „Маупукек“, Мисел Џо, вчера изјави дека истрагата ќе биде мачна за екипажот на „Поларен принц“.

„Ќе биде тешко за екипажот“, рече тој. „Тие се грижат за бродот, се грижат за себе и се грижат за семејството што е на бродот. Моето срце е со нив. За сите нив. Тоа е загуба на животи и тоа никогаш не е лесно за едно семејство.“

„Поларен принц“ изгуби контакт со подморницата „Титан“ во недела утрото, околу 90 минути откако почнал да ја влече подморницата кон „Титаник“, 700 километри од брегот на Њуфаундленд.

Возило управувано од далечина го пронајде конусот од опашката на подморницата на морското дно на приближно 1.600 стапки (488 метри) од „Титаник“, како и други остатоци.