Од урнатините во Газа извлечени 66 Палестинци по прекинот на огнот

ГАЗА (АА) – Тимовите на цивилната одбрана извадија тела на 66 Палестинци од урнатините на уништените куќи во Појасот Газа, пренесува Анадолу.

Цивилната заштита соопшти дека во текот на вчерашниот ден биле извадени 58 тела од урнатините во јужниот дел на Газа, а осум биле извлечени во северниот дел на Газа.

Истакнато е дека тимовите за цивилна одбрана и волонтерите продолжуваат да пребаруваат низ урнатините и покрај недостигот на механизација за нивно извлекување.

Договорот за прекин на огнот во Газа стапи на сила во неделата, прекинувајќи ја израелската геноцидна војна во која од 7 октомври 2023 година загинаа речиси 47.000 Палестинци, главно жени и деца, а беа повредени над 110.700.

Договорот за прекин на огнот, кој се состои од три фази, вклучува размена на затвореници и одржлив мир, со цел постигнување траен прекин на огнот и повлекување на израелските сили од Газа.

Во израелските напади исчезнаа над 11.000 луѓе, предизвикани се големо уништување и хуманитарна криза во која умреа многу постари лица и деца во една од најтешките глобални хуманитарни катастрофи досега.

Во ноември Меѓународниот кривичен суд (МКС) издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел се соочува и со случај за геноцид пред Меѓународниот суд на правдата за неговите постапки во енклавата.