Новоименуваниот палестински премиер Мустафа: Нема држава без Газа

РАМАЛА (АА) - Новоименуваниот премиер на Палестина, Мухамед Мустафа, изјави дека новата влада ќе работи на ублажување на страдањата на палестинскиот народ во Појасот Газа, јавува Анадолу.

„Нема држава без Газа, а во Газа не може да има држава далеку од Ал Кудс (Ерусалим) и Западниот Брег“, рече Мустафа.

Како што наведе палестинската новинска агенција ВАФА, премиерот Мустафа во писмото што му го испратил на палестинскиот претседател Махмуд Абас истакнал дека ја прифатил задачата за формирање на 19-та влада.

Мустафа вели дека му е чест што добил задача да ја формира новата палестинска влада.

Тој, исто така, предупреди на континуираните напади на Израел врз Газа од 7 октомври 2023 година.

„Свесен сум за сериозноста на оваа фаза низ која минува нашето национално прашање, за тешките услови во кои се наоѓаат нашите одлучни луѓе и за сериозноста на проблемот“, рече тој.

Тој го стави фокусот и на убивањето, разорувањето и тероризмот кои го спроведуваат еврејските доселеници на Западниот Брег.

„Нападите на кои е изложен палестинскиот народ бараат поголеми напори, обединување на сопствените редови и продолжување на активностите во арапската и меѓународната заедница“, рече Мустафа.

Мухамед Мустафа, долгогодишен економски советник на претседателот Абас, во четвртокот беше именуван за нов премиер на Палестина.

Функцијата ја презеде од Мухамад Ибрахим Штаје, кој беше премиер од 2019 до 2024 година, пред да објави на 26 февруари дека поднесува оставка.