Нигерија: Во експлозија на цистерна со гориво загинаа 12 лица

АБУЏА

Во западноафриканската држава Нигерија животот го загубија најмалку 12 лица откако дојде до експлозија на цистерна за гориво што се превртела додека се движела по патот, пренесува Агенција Анадолија (АА).

Јакуб Мухамед, координаторот на Националната организација за безбедност на патиштата за нигериската федерална држава Бенуе, за локалните медиуми изјави дека возачот на цистерната со гориво ја загубил контролата над возилото што се движело на релацијата Ошигбуду - Обагаџи, по што настанала експлозија.

Координаторот Мухамед информираше дека според првичните проценки, од експлозијата животот го загубиле 12 лица, меѓу кои 3 жени и едно дете, и дека има голем број повредени.

Мухамед соопшти дека некои од повредените се наоѓаат во тешка состојба и изрази загриженост поради можноста за зголемување на бројот на починати.

Експлозијата предизвикала оштетувања на куќите и продавниците што се наоѓале во околината на несреќата.