Неизвесна трка за мнозинство во Сенатот на САД: Демократите освоија едно сенаторско место од Џорџија

ЊУЈОРК (АА) - Кандидатот на Демократската партија, пасторот Рафаел Варнок, освои едно од две сенаторски места од сојузната американска држава Џорџија, јавува Агенција Анадолија (АА).

Во Џорџија вчера беше одржан вториот круг на сенаторски избори, а според прелиминарните резултати на агенцијата АП, Варнок освои 50,5 отсто од гласовите.

Варнок во изборната трка ја победи републиканската кандидатка Кели Лоефлер и стана прв црномурест сенатор од таа јужна американска држава.

АП сè уште не ги објави прелиминарните резултати од изборната трка за второ сенаторско место, за кое се борат демократот Џон Ософ и републиканецот Давид Перду.

Доколку го освои и вториот сенаторски мандат во Џорџија, Демократската партија би го презела мнозинството во Сенатот и така би имала мнозинство во двата дома на американскиот Конгрес.

Варнок од 2005 година служеше како виш пастор на баптистичката црква во Атланта, а се искачи на политичката сцена како лидер на кампањата за државно здравствено осигурување за сиромашните и работно неспособните лица.