Големата порота на Џорџија со обвинение за Трамп и 18 негови соработници за мешање во изборите

ВАШИНГТОН (АА) - Големата порота на Џорџија, САД, синоќа го врати обвинението од 41 точка против поранешниот претседател Доналд Трамп и 18 негови политички соработници за обвиненија поврзани со наводни активности за поништување на изборните резултати во државата во 2020 година, јавува Анадолу.

Обвиненијата беа поднесени откако Големата порота ги ислуша сведочењата на сведоците, меѓу кои и поранешниот гувернер Џеф Данкан, и ги оцени доказите од обвинителите.

Откако Трамп ја напушти функцијата поднесени му се четири обвиненија во државните и федералните судови. Обвиненијата се во врска со давање „пари за молчење“ на ѕвезда во возрасни филмови, дејства за поништување на резултатите од националните избори и незаконско чување доверливи документи и активности за спречување на истражителите да ги извршат своите должности.

Вчера во американската сојузна држава Џорџија Трамп е обвинет за 13 кривични дела, меѓу кои и за прекршување на Законот против измами и корумпирани организации на државата Џорџија (RICO), барање за прекршување на заклетва од јавен службеник, заговор за претставување како јавен службеник и заговор за давање лажни изјави.

Законот RICO и верзиите на овој закон во сојузните држави првично се изработени за сузбивање на организиран криминал, но оттогаш се проширени за да опфатат и други криминални субјекти во кои се вклучени повеќе поединци.

Во обвинението од 98 страници се вели дека Трамп и другите обвинети, вклучително и личниот адвокат Руди Џулијани, поранешниот шеф на Кабинетот, Марк Медоус, адвокатите Сидни Пауел и Џон Истман и други, „формирале криминална организација чии членови и соработници учествувале во разни поврзани криминални активности“.

Во него се опфатени и други обвиненија поднесени против Трамп, и други дела како давање лажни изјави, фалсификување, поднесување лажни документи, влијаење врз сведоци, компјутерска кражба, компјутерски прекршок, компјутерско нарушување на приватноста, заговор за измама на државата, дела во кои е вклучена кражба и лажно сведочење.

Има уште 30 лица што не се обвинети а кои се дел од мрежата соработници.

Случајот против Трамп и неговите соработници дојде по двегодишна истрага водена од обвинителот на Округот Фултон, Фани Вилис.

Истрагата на Вилис беше поттикната од повикот на Трамп на 2 јануари 2021 година до државниот секретар на Џорџија, Бред Рафенспергер, во кој тој побара од високиот државен функционер да „најде 11.780 гласа“, бројка што би му била потребна за да победи на изборите. Подоцна снимката од повикот беше објавена во медиумите.

Вилис продолжи да истражува и за лажните локални електори кои се обиделе да потврдат лажни изборни резултати во корист на Трамп.

Победата на претседателот Џо Бајден во јужната сојузна држава беше потврдена по две пребројувања што ги следеше републиканскиот гувернер на државата, Брајан Кемп, кој на крајот ги потпиша резултатите и покрај жестокиот јавен протест на Трамп.

Дури и пред официјално да се поднесат обвиненијата, кампањата на Трамп беснееше против Вилис, како што поранешниот претседател постојано правеше во минатото, нарекувајќи ја „бесен пристрасник што води кампања и собира средства за гонење на претседателот Трамп преку овие лажни обвиненија“.

„Тајмингот на овој последен координиран напад на пристрасен обвинител во претежно демократска надлежност не само што ја издава довербата на американскиот народ, туку и ја разоткрива вистинската мотивација што ги поттикнува нивните фабрикувани обвинувања“, се вели во соопштението на кампањата.