Најмалку 87 Палестинци се убиени, главно жени и деца, во масакрот на Израел во северниот дел на Газа

ГАЗА (АА) - Во израелското бомбардирање на регионот Мешру Беит Лахија, во северниот дел на Појасот Газа, убиени се најмалку 87 Палестинци, а над 40 се ранети, соопшти денес Министерството за здравство во Газа, известува Анадолу.

Во соопштението се вели дека повеќе од 40 Палестинци се ранети, меѓу кои има лица што се во критична состојба.

Израелски воени авиони извршија смртоносни бомбардирања врз градот доцна синоќа, уништувајќи цел станбен блок.

Според очевидци, спасувачите спроведуваат акции за пребарување под урнатините за откривање на преживеаните.

Израелската армија ја продолжи својата масовна 16-дневна офанзива во северниот дел на Газа додека тоа подрачје го држи под опсада.

Израел ја продолжи својата брутална офанзива со неселективно бомбардирање на цивилни населби, училишта, верски објекти и болници во Појасот Газа од октомври минатата година, и покрај резолуцијата на Советот за безбедност на ОН со која се повикува на итен прекин на огнот.

Во овие напади Израел уби повеќе од 42.600 Палестинци, главно жени и деца, а речиси 99.800 се ранети.

Раселено е речиси целото население на Појасот Газа поради израелските напади и блокадата што доведе до недостиг на храна, чиста вода и лекови.

Израел е обвинет за геноцид пред Меѓународниот суд на правдата, но и покрај тоа, израелските напади врз Појасот Газа продолжуваат со несмален интензитет, а испораката на хуманитарната помош не е доволна за решавање на хуманитарната катастрофа.