Recep Şakar
17 Јануари 2022•Ажурирај: 18 Јануари 2022
МЕЛБУРН (АА) - Австралискиот премиер Скот Морисон денес изјави дека на тенисерот кој е број еден во светот, Новак Ѓоковиќ, би можело да му биде дозволен влез во Австралија пред истекувањето на рокот од три години под соодветни услови, јавува Агенција Анадолија (АА).
На Ѓоковиќ му е забранет влезот во Австралија во времетраење од три години откако вчера тројца судии на Федералниот суд го потврдија укинувањето на неговата виза.
„Иако забраната е на три години, постои можност да се врати во вистински околности, кои тогаш би биле испитани“, рече премиерот во изјава за австралиската радиостаница „Канал 9“.
Ѓоковиќ на 4 јануари изјави дека му било одобрено медицинско изземање од вакцинација против Ковид-19. Владата на австралиската држава Викторија и организаторите на турнирот го одобрија неговото медицинско изземање од вакцинацијата против Ковид-19 за натпреварот, што му овозможи да добие виза за патување. Но, австралиските гранични служба го одбија изземањето и му ја укинаа визата по доаѓањето во Мелбурн. Ѓоковиќ потоа помина четири ноќи во хотелски притвор пред судијата во понеделникот да ја поништи одлуката за укинување на визата.
Меѓутоа, Ѓоковиќ е приведен во саботата откако австралиските власти по втор пат му ја укинаа визата. Федералниот суд со тричлениот совет вчера едногласно пресуди против Ѓоковиќ, откако го разгледа неговиот случај.
Австралија наложува сите играчи да бидат целосно вакцинирани против коронавирусот за да се натпреваруваат на овогодинешниот прв грен слем тениски турнир.
Новак Ѓоковиќ со авион од Дубаи денес замина во Србија откако е депортиран од Австралија.
Ѓоковиќ победи на Австралија опен во 2008, 2011, 2012, 2013, 2015, 2016, 2019, 2020 и 2021 година. Австралија опен 2022 година, првиот грен слем оваа година, се одржува во Мелбурн од 17 до 30 јануари.
