Млада Палестинка изработува рамазански фенери во Газа од кутиите од хуманитарна помош

ГАЗА (АА) - Палестинката Рихан Шераб, која живее во градот Кан Јунис во јужниот дел на Појасот Газа, разурнат од израелските напади, изработува традиционални украси со приближувањето на месецот Рамазан, јавува Анадолу.

Со цел да ги одржи живи атмосферата и традицијата на месецот Рамазан, Шераб прави фенери во различни големини и бои користејќи кутии од хуманитарната помош.

Во Појасот Газа, каде нападите на Израел траеја речиси 16 месеци и предизвикаа големи разурнувања, младата Палестинка Рихан Шераб се обидува да им ја донесе радоста на Рамазан на децата на раселените семејства.

Израелската армија започна сеопфатен напад и силно бомбардирање на Појасот Газа на 7 октомври 2023 година, откако имаше наметнато блокада цели 17 години, уништувајќи ја инфраструктурата, училиштата, болниците и џамиите.

1,5 милиони луѓе во Појасот Газа беа раселени и останаа без покрив над главата поради силното израелско бомбардирање и принудното раселување.

На 2 февруари, шефот на владината канцеларија за медиуми во Газа, Саламе Маруф, го прогласи Појасот Газа за „зона на катастрофа“.

Појасот Газа и другите делови на Палестина, исто како и другите арапски земји, ги осветлуваат своите домови, улици и авении со фенери како дел од одбележувањето на месецот на постот, Рамазан.

Младата Палестинка, која шаторот во кој престојува го претворила во работилница, рече дека рамазанските украси ги изработува од картони од хуманитарната помош кои ги сече со стари ножици и ги обложува со шарени ткаенини.

Истакнувајќи дека нејзината цел е да ги врати Палестинците, особено децата, кои беа подложени на разорната војна на израелската армија, на рамазанската атмосфера на која беа навикнати порано, Шераб рече дека се обидува да направи што е можно повеќе фенери, кои планира да ги дистрибуира на почетокот на Рамазан.

Во муслиманската култура фенерите го симболизираат светиот месец.

Во делови од светот, како што е Египет и други исламски земји, фенерите ги осветлуваат улиците во море од бои, создавајќи прекрасна и магична атмосфера.

Покрај нивната употреба во светите месеци и ноќи, се користат и како украси во домовите во рамазанскиот период.