Yasemin Kalyoncuoğlu
21 Јули 2021•Ажурирај: 22 Јули 2021
НЕАПОЛ (АА) - ЈАСЕМИН КАЛЈОНЏИОГЛУ - На состанокот на министрите за животна средина и енергетика од групата Г-20, што ќе се одржи во Неапол, Италија, министрите на земјите членки и претставниците на релевантните организации ќе разговараат и ќе бараат решенија за прашањата за губењето на биолошката разновидност и загадувањето, деградацијата на земјиштето и за неодржливото користење на водата и другите природни ресурси, јавува Агенција Анадолија (АА).
На состанокот на министрите за животна средина и енергетика од групата Г-20, што ќе започне утре во Неапол, ќе бидат оценети меѓународните случувања и ќе се разговара за одржливите политики за заштита на природата.
Состанокот, што ќе се одржи во историската палата „Палацо реале“ (Кралска палата) во Неапол, ќе го модерира италијанскиот министер за еколошка трансформација, Роберто Чинголани.
Министрите од Г-20 одговорни за климата и енергетиката, исто така, ќе се состанат во Неапол во петок, 23 јули, и ќе дебатираат за борбата против климатските промени, развојот на заедничка визија во енергетиката и зајакнување на областите за соработка.
Мурат Курум, министерот за животна средина и урбанизам на Турција, ќе присуствува на двата состанока со техничкиот комитет составен од соодветните министерства.
Министерот Курум на состаноците ќе информира за активностите на Турција во областа на животната средина, климата и енергетиката, и ќе ги презентира прашањата поврзани со проектите и студиите што ќе се спроведуваат со други земји членки.
Курум, исто така, за време на дводневниот состанок ќе одржи и билатерални средби.
На првиот ден од состанокот ќе се одржат сесии на темите „Природен капитал за зачувување и управување“ и „Заеднички напори за одржлива и циклична употреба на ресурсите“.
На вториот ден од состанокот ќе се дискутира за „Издржливи, паметни и одржливи градови“, „Одржливо закрепнување и можности што ги нудат иновативните технолошки решенија“, „Поддршка за зелени финансии за инклузивно и одржливо закрепнување“ и „Транзиција кон чиста енергија“.
Самитот на лидерите на Г-20 ќе се одржи во Рим на 30-31 октомври 2021 година.
