Министерот за одбрана на Украина: „Можните тензии со Русија несомнено ќе имаат катастрофални последици за цела Европа“

ВАШИНГТОН

Ние многу добро знаеме дека Русија може да ги ескалира тензиите во секој момент. Ние сме подготвени да ја браниме нашата земја и иднината на нашите деца. Можната тензија несомнено ќе има катастрофални последици за цела Европа, рече министерот за одбрана на Украина, Олексиј Резников, на средбата со американскиот секретар за одбрана, Лојд Остин во Пентагон, пренесува Агенција Анадолија (АА).

Во период кога Русија продолжува да ја зголемува војската во областите близу украинската граница, украинскиот министер за одбрана, Резников, одржа разговори во Вашингтон.

Во писменото соопштение од Пентагон во врска со средбата со министерот за одбрана на Украина, Резников, се нагласува: „Министрите разговараа за голем број безбедносни прашања, вклучително и дестабилизирачките дејства на Русија во регионот и ги споделија приоритетите наведени во американско-украинската стратешка одбранбена рамка потпишана на 31 август.“

Во кратката изјава за медиумите пред започнување на состанокот, Остин рече:

„Со нетрпение очекувам да разговараме за тоа како можеме да ја имплементираме оваа [американско-украинска стратешка одбранбена] рамка за да продолжиме да го унапредуваме нашиот заеднички приоритет против руската агресија и да ја продлабочиме нашата соработка во областите како што се безбедноста на Црното Море, сајберодбраната и споделувањето разузнавачки информации.“

Од друга страна, Резников рече дека ги цени стратешките односи на Украина со САД и помошта на САД во спротивставувањето на руската агресија.

Министерот Резников, исто така, додаде дека Украина е решена да го развие своето партнерство со САД, особено на полето на спротивставување на руските хибридни напади.

„Во Украина многу добро знаеме дека Русија може да ги ескалира тензиите во секој момент. Подготвени сме да ја браниме нашата земја и иднината на нашите деца. Оваа можна ескалација несомнено ќе има катастрофални последици за цела Европа. Дали тоа ќе се случи или не, зависи главно од единството и одлучноста на цивилизираниот свет [во спротивставувањето] на оваа агресија“, нагласи украинскиот министер за одбрана, Резников.