Министерот за одбрана на Летонија ги посети капацитетите на турскиот производител на беспилотни летала „Бајкар“

ИСТАНБУЛ (АА) - Заменик-премиерот и министер за одбрана на Летонија, Артис Пабрикс, ги посети производствените капацитети на компанијата „Бајкар“, производителот на беспилотни летала, пренесува Агенција Анадолија (АА).

Во соопштението објавено на твитер-профилот на компанијата „Бајкар“ се нагласува: „Летонскиот министер за одбрана г-дин Артис Пабрикс и неговата делегација ги посетија производствените капацитети на компанијата „Бајкар“, производителот на беспилотни летала. За нас беше задоволство да им бидеме домаќини.“

За време на посетата, министерот Пабрикс беше придружуван од генералниот директор на „Бајкар“, Халук Бајрактар, кој даде информации за системите за беспилотни летала.

За време на неговата посета, министерот Пабрикс покажал голем интерес за првиот летечки автомобил на Турција, „Џезери“.

Министерот Пабрикс во однос на посетата, на својот профил на Твитер напиша: „Ви благодарам за прекрасниот пречек. Турската индустрија и нејзините истражувања и развој се со највисоки светски стандарди. Како сојузник на НАТО, ова го цениме многу. На сите ви посакувам успех.“

Од друга страна, договорот за извоз на вооружени беспилотни летала „Бајрактар TB2“ во Полска го потпишаа генералниот директор на „Бајкар“, Халук Бајрактар, ​​и полскиот министер за одбрана, Мариуш Блашчак, во присуство на претседателот на Турција, Реџеп Таип Ердоган, и на полскиот претседател, Анджеј Себастијан Дуда, во Претседателскиот комплекс минатиот месец.

Со овој договор, Турција за прв пат ќе извезува високотехнолошки беспилотни вооружени летала (SİHA) во земја членка на НАТО и ЕУ.