ХАСАБ (АА) – Меѓународниот фестивал за нуркање во Мусандам заврши вчера во Хасаб по четиридневна програма со натпревари, изложби и еколошки активности, со цел промоција на северните води на Оман како светска дестинација за нуркање, јавува Анадолу.

На првата реализација на фестивалот се собраа професионални и рекреативни нуркачи, љубители на авантури и фотографи од повеќе земји.

Во програмата беа вклучени активности како кајакарење и нуркање на најпредизвикувачките подводни локации во Мусандам.

- Спој на заштита на природата и авантура -

Организаторите го осмислија фестивалот како платформа што го спојува екотуризмот со заштитата на животната средина.

Учесниците садеа корали, организираа најголема кампања за чистење на гребените во регионот и присуствуваа на работилници за морска медицина и дигитални туристички алатки.

Меѓународно жири го оценуваше натпреварот за подводна фотографија и видео, кој ја истакна биолошката разновидност на регионот и ја зголеми свеста за заштита на морската средина.

- Инклузивност и рекордери -

Фестивалот ја истакна и инклузивноста во нуркањето.

Кувајтскиот пара-атлет и нуркач Фаисал Џавад, трикратен светски рекордер на Гинис, го изврши своето прво нуркање во Мусандам и засади корал.

„Секој со попреченост може да дојде и да нурка овде. Јас дојдов и нуркав како секој друг“, вели Џавад.

Меѓу истакнатите гости беа и египетскиот светски рекордер Ахмед Габр и емиратскиот нуркач Мuхамед ал-Тунаиџи, кои ги предводеа истражувачките нуркања.

- Проширување на програмата во иднина -

Посетеноста на фестивалот ги надмина очекувањата на организаторите, изјави Бадер ал-Шехи, раководител на Центарот за откритија на Мусандам.

„Фестивалот ги надмина нашите очекувања. Имавме многу гости од различни земји и навистина ја постигнавме целта што ја посакувавме“, рече Ал-Шехи.

Организаторите планираат следната година да ја прошират програмата со нови активности и поголемо меѓународно учество.

„Секој нуркач, секој љубител на океаните треба да ни се придружи следната година. Ќе додадеме нови активности, вклучително и обиди за надминување рекорди“, додаде тој.

Фестивалот го позиционира Мусандам како нова атрактивна дестинација за одржлив нуркачки туризам и го поддржува напорот за заштита на морскиот екосистем во регионот.