Медиуми: Израелскиот министер Ганц се очекува да поднесе оставка

КУДС (ЕРУСАЛИМ) (АА) - Министерот од воениот кабинет на Израел, Бени Ганц, се очекува вечерва да поднесе оставка, јавуваат израелските медиуми, пренесува Анадолу.

Минатиот месец Ганц го постави 8 јуни како краен рок за премиерот Бенјамин Нетанјаху да подготви повоен план во Газа или ќе ја напушти коалицијата. Вчера, сепак, тој ја одложи планираната прес-конференција.

Ганц, поранешен министер за одбрана, рано утрово изјави дека ќе даде изјава за медиумите во вечерните часови поради очекувањата дека ќе ја објави својата оставка.

Според израелското армиско радио, тој ќе ја даде својата изјава во 20:00 часот по локално време.

Весникот „Једиот Ахронот“ очекуваше дека Ганц и министерот од воениот кабинет Гади Ајзенкот ќе ја напуштат коалицијата, наведувајќи ја нивната неспособност да влијаат врз донесувањето одлуки.

Рано утрово, израелскиот опозициски лидер Јаир Лапид го повика Ганц да се повлече од Владата.

Вчера, Нетанјаху побара од Ганц да остане во Владата за единство при вонредни состојби.

„Го повикувам Бени Ганц - не ја напуштајте Владата за вонредни состојби. Не се откажувајте од единството“, напиша Нетанјаху на X.

Најмалку 37.084 Палестинци се убиени во израелската офанзива на Појасот Газа од октомври минатата година, а повредени се 84.494 лица.

Израел ја продолжува својата брутална офанзива врз Појасот Газа и покрај резолуцијата на Советот за безбедност на Обединетите нации со која се бара итен прекин на огнот.

Израел е обвинет за геноцид пред Меѓународниот суд на правдата, кој во својата последна пресуда му нареди на Тел Авив веднаш да ја прекине операцијата во Рафа, каде што повеќе од милион Палестинци побараа засолниште од војната.